IS-limur tikin í Íslandi

Løgreglan í Íslandi hevur handtikið ein mann, sum skal vera virkin limur í felagsskapinum Islamskur statur, stytt IS.

Maðurin varð 12. januar, saman við tveimum øðrum monnum, handtikin í Akureyri og sendur aftur til Grikkalands sama dag.

Hann er ættaður úr Irak og kom í september í fjør til Íslands við konu síni og seks børnum, eftir at hava verið í Týsklandi. 

Hann bað um friðskjól í Íslandi, men umsóknin var havnað, tí maðurin hevur altjóða verju í Grikkalandi.

Kannað saman við Europol

Íslendska løgreglan hevur síðani í november í samstarvi útlendskar løgreglumyndugleikar, eitt nú Europol, kannað málið, eftir at løgreglan fekk upplýsingar um, at maðurin var virkin limur í islamska felagsskapinum IS, upplýsti íslendski ríkispolitiovastin á tíðindafundi.

Spurdur, um maðurin var virkin fyri felagsskapin meðan hann var í Íslandi, svarar ríkispolitiovastin stutt, at tey fingu upplýsingar um, at ein maður var í landinum, sum var limur í yvirgangsfelagsskapinum IS.

Vilja einki upplýsa

Løgreglan vil ikki upplýsa, um maðurin var virkin fyri IS í Íslandi, og heldur ikki, um hann var eftirlýstur. 

Løgreglan vil heldur ikki siga, hvar hinir báðir menninir eru - um teir eru í Íslandi, og um teir hava sambandi við málið, annað enn, at teir eru latnir leysir.  

Mál av slíkum slagi hava verið í Íslandi fyrr. Seinast í 2017, skrivar RÚV.