EM í hondbólti: Týskland fekk síðsta hálvfinaluplássið

Vertstjóðin, Týskland, tryggjaði sær í dag fjórða hálvfinaluplássið í EM í hondbólti, har Danmark bíðar.

Eysturríki, Ungarn og Týskland høvdu øll møguleikan at spæla seg víðari undan seinasta umfari í dag, men bæði Eysturríki og Ungarn taptu sínar dystir. Týskarar kendu tískil sína lagnu, áðrenn teir taptu seinasta dystin í miðumfarinum fyri Kroatia.

Í hinari hálvfinaluni skal Svøríki royna seg ímóti Fraklandi. Sviar og fraklendingar spæla fyrru hálvfinaluna fríggjadagin, og síðan spæla týskarar ímóti dønum. 

EM-finalan verður spæld sunnudagin.