Støðudagføring: Kambur er sokkin, og tveir menn eru enn saknaðir

Tveir mans, ið eru 47 og 57 ára gamlir, eru ikki komnir afturíaftur, eftir at frystilínuskipið Kambur í morgun fekk ein sjógv og síðani sakk í ein útsynning úr Akrabergi. 

Jón Klein Olsen, varapolitiinspektørur, sigur, at 16 mans vóru við Kambi, og at 14 eru bjargaðir, og teir eru allir á Suðuroyar sjúkrahúsið. 

"Menninir, ið eru bjargaður, prátaðu og gingu sjálvir, men lítið er at ivast í, at teir hava verið kaldir og illa fyri," greiðir Jón Klein Olsen frá. 

Flogfar á veg at hjálpa við leitingini

Sambært Edvardi Bjarnasyni, leiðara á MRCC-støðini, so samskipar Brimil leitingina saman við skipunum, sum vóru hjá Kambi, tá Kambur sakk. Tey eru Breiðanes, Sandshavið og Hamranes.

Bjargingartyrlan er eisini á staðnum. 

Eitt serútgjørt flogfar hjá donsku sjóverjuni er á veg á staðið at hjálpa til við leitingini eftir saknaðu monnunum. 

Gekk sjótt

Tað gekk skjótt, tá Kambur fekk ein sjógv og sendi út neyðarkall í morgun.

Tann seinasti maðurin, sum varð bjargaður av Kambi, helt sær fastan á skipssíðuni í tríggjar tímar, áðrenn hann varð bjargaður. Maður var í vanligum klæðum, tí hann náddi ikki í bjargingardraktina. 

"Útlitini at finna fólk á lív minkar, so hvørt tímarnir ganga," ásannar Edvard Bjarnason, leiðari á MRCC-støðini.

"Um menninir eru í bjargingardraktum, so kunnu teir klára seg í fleiri tímar í sjónum. Men eru teir í vanligum klæðum, so klára teir seg ikki nógvar tímar í sjónum."

Hoyr samrøðurnar við Jón Klein Olsen, varapolitiinspektør, og Edvard Bjarnason, leiðara á MRCC-støðini, her.