Gongst illa at skipa stjórn í Hollandi

Tað gongst illa hjá víðgongda hollendska høgrapolitikaranum, Geert Wilders, at skipa stjórn, nú ein flokkur aftrat hevur tikið seg úr samráðingunum.

Flokkurin hjá Pieter Omtzigt, NSC, kunngjørdi í gjár, at hann fer burtur úr samráðingunum. Sostatt verður tað ómøguligt hjá Wilders at skipa meirilutasamgongu.

NSC-flokkurin sigur, at hann fer at verða jaligur í framhaldandi satalum, men verður ikki við í stjórnini. Hinvegin fer flokkurin at umhugsa at stuðla eini minnilutastjórn.

Wilders vann óvæntað

Tað kom sera óvart, at Wilders og flokkur hansara, Konservativi Liberali flokkurin, sum er anti-islamistiskur og ivasamur um veðurlagsbroytingar, vann valið í Hollandi í november.

Wilders fór undir samráðingar við tríggjar flokkar, men uttan NSC-flokkin og teir 20 tingsessirnar í tjóðartinginum, fær hann ikki skipað meirilutastjórn. 

150 tingsessir eru í hollendska tjóðartinginum.

Ósemja um fleiri mál

Ósemja hevur verið millum Wilders og NSC-flokkin um anti-islamistiska manifestið hjá Wilders, ætlaninar um at Holland skal úr ES og uppskot um stórar skattalættar.

Seinast, stjórn skuldi skipast í Hollandi, vardu samráðingarnar í 271 dagar, áðrenn Mark Rutte umsíðir kundi gerast forsætisráðharri.

Hann stendur nú á odda fyri eini fyribilsstjórn, til nýggj stjórn er skipað.