Eldur kyknaði á Slættabergi

- Fleiri sóu eldin, tí hesa løtuna mundu millum 15 og 20 fólk ringja inn at boða frá, sigur vakthavandi á politistøðini í Havn.

Sløkkiliðið kom skjótt á staðið, men tað var eitt sindur trupult at sløkkja, tí eldurin breiddi seg av brúnni niður í kømrini, ið eru beint undir brúnni.

Men um 10-tíðina í gjárkvøldið var eldurin sløktur.

Ógreið orsøk
Ikki er greitt, hví eldur kom í á Slættabergi, sum er yvir 40 ára gamal og ikki í vinnu longur.

Teknikarar frá politinum fara í dag til Klaksvíkar at gera kanningar fyri at fáa staðfest orsøkina.

Politiið sigur, at einar tveir tímar undan eldinum vóru eini 10 til 20 ungfólk sædd umborð á Slættabergi og einum øðrum skipi har.

- Vit vilja fegin frætta frá teimum ella hoyra frá fólki, sum kann hava sæð nakað, sigur vakthavandi hjá politinum.