FMA 2024: Per I. er ársins tónleikari, og Brimheim eigur ársins samleika

Per Ingvaldur Højgaard Petersen fekk virðislønina fyri ársins tónleikara. Og tað er kanska heldur ikki so løgið, tá hugt verður eftir tí langa listanum av tónleikaframførslum, útgávum og sangum, sum hann hevur sett sín dám á. 

Eitt nú hevur Per Ingvaldur verið á pallinum við Eivør, Byrta, Anniku Hoydal, Leu Kampmann, Elingborg, Klingra, EMP, Yggdrasil, Einangran, Tjant og Guðrun & Bartal. 

Tað var ein stuttmæltur Per Ingvaldur, sum takkaði fyri heiðurin, tá hann tók ímóti heiðrinum í Norðurlandahúsinum. 

Brimheim besta samleikan

Brimheim er eitt av heitastu nøvnunum á føroyska og útlendska tónleikapallinum í løtuni. Í danska útvarpinum verða eisini stakløgini "Literally Everything"  og "Brand New Woman" spæld í heilum. Og fyri pressumyndir, heildarkonsept og sjónband til júst hesini løgini, hevur dómsnevndin valt at lata heiðurslønina fyri myndlistarliga samleikan til Brimheim. 

Sambært dómsnevndini hevur Brimheim eitt greitt konsept, har man so at siga hoyrir tónleikin, tá man sær myndirnar. Ein ófiltrerað fagnan av tí ljóta, og ein konseptuellur suppumoli, var sagt.

Hóast 2023 var eitt ár við nógvum góðum visuellum konseptum, metti dómsnevndin kortini, at tað ikki bar til at koma uttan um Brimheim, og hvussu gjøgnumførdur hennara visuelli samleiki er.

Brimheim, Brand New Woman

FMA-vinnarar

12 heiðurslønir vera latnar til ársins FMA. Higartil eru fimm virðislønir latnar.

Ársins klassiski heiður: Kristina Thede Johansen 

Ársins spíri: SUPERVISJÓN

Ársins tónasmiður: Tróndur Bogason

Ársins tónleikari: Per Ingvaldur Højgaard Petersen

Ársins myndlistarligi samleiki: Brimheim