- Tíðindi, mentan og ítróttur
FMA 2024: Virðislønir fyri tekst, átak og útflutning handaðar
FMA 2024: Virðislønir fyri tekst, átak og útflutning handaðar
Hans Jákup Kollslíð hevur vunnið virðislønina fyri ársins tekst, Plátufelagið TUTL fekk ársins útflutningsheiður, og Summartónar var heiðrað sum ársins átak til FMA 2024
Hans Jákup Kollslíð fær handan FMA-heiðurin fyri at hava skrivað ársins tekst frá Kára P.
Mynd: Bjarni Árting Rubeksen
09.03.2024 - 20:45
Tað er í kvøld, at føroyskur tónleikur verður fagnðaur, nú virðis- og heiðurslønir vera handaðar til FMA 2024.
Hans Jákup Kollslíð vann virðislønina fyri ársins tekst fyri tekstin til "Rúm", sum Marius Ziska hevur framførir.
Hans Jákup Kollslíð hevur hesu seinnu árini ritað sítt navn á føroyska listapallin, eitt nú sum teksthøvundur hjá vælumtókta og nógva spælda Mariusi Ziska.
Dómsnevndini segði, at orðini hjá Hans Jákupi geva løgunum eitt flog, og saman við Mariusi Ziska hava teir gjørt sangir, sum eru vornir fólkaogn.
Hans Jákup vísir í verki, hvussu skrivaða orðið megnar at ríka løg, og at stórbær list skapast, tá skaldskapur og tónleikur renna saman.
Høgni Hoydal, landsstýrismaður í uttanríkismálum, handaði Kristiani Blak útflutningsheiðurin (Mynd: Bjarni Árting Rubeksen)
Útflutningsheiður latin, og ársins átak kjósað
Plátufelagið TUTL fekk ársins útflutningsheiðursløn. Plátufelagið hevur leingi verið ein grundsúla undir føroyskum tónleiki, eins og landsstýrismaðurin í vinnumálum, Høgni Hoydal, sum lat heiðurin, nevndi.
TUTL var stovnað í 1977 av Kristiani Blak, og tað er sostatt eisini Føroya elsta plátufelag. Og tað var eisini stovnarin, Kristian Blak, sum tók ímóti heiðrinum.
- Túsund takk fyri. Tað er eisini eitt gott toymi, sum eg arbeiði saman við. Eg kundi ikki havt gjørt tað sjálvur, segði ein errin Kristian Blak, sum eisini eigur sín í lut í tiltakinum Summartónar, sum var kjósað til ársins átak.
"Ársins átak" verður latið fyriskiparum, samskiparum, stovnum, feløgum og øðrum eldsálum, sum dagliga skipa fyri og skapa umstøður til tónleikarar at virka í.
Summartónar, sum á hvørjum ári síðani fyrst í 90unum hevur syrgt fyri at fylla summarið við forvitnisligum konsertum kring landið, gjørdist ársins tónleikarliga átak.
FMA-heiðurslønir
12 heiðurslønir vera latnar til ársins FMA. Higartil eru átta virðislønir latnar.
Ársins klassiski heiður: Kristina Thede Johansen
Ársins spíri: SUPERVISJÓN
Ársins tónasmiður: Tróndur Bogason
Ársins tónleikari: Per Ingvaldur Højgaard Petersen
Ársins myndlistarligi samleiki: Brimheim
Ársins sangur: "Literally Everything" - Brimheim
Ársins tekstur: Hans Jákup Kollslíð - Rúm
Ársins útflutningsheiður: Plátufelagið TUTL
Ársins átak: Summartónar
Er kopiera
Nýggjastu sendingar í ÚV
Nýggjastu sendingar í SV
