Regin Jacobsen: Vit mugu hava fría atgongd til ES-marknaðin

Føroyar skulu hava betri marknaðaratgongd til ES. Tað lovar Ursula von der Leyen, sum hevur vitjað í Føroyum, har hon millum annað hevur undirritað eitt semjuskjal saman við løgmanni, Akseli V. Johannesen. 

Ein, sum heldur, at orðini hjá Ursulu von der Leyen um betri marknaðaratgongd geva fyritøkum, sum vilja víðarivirka, orsøk til vón, er Regin Jacobsen, stjóri á Bakkafrosti. Núverandi marknaðarskipan forðar, sambært Regini Jacobsen, fyri vørumenning og nýhugsan.

- Vit hava tørv á einari fríari marknaðaratgongd. Við skipanini, sum er í dag, so skal søkjast um loyvi um at selja eina nýggja vøru, áðrenn farið verður undir søluna. Tað er ein ómøgulig tilgongd, sum forðar fyri vørumenning og nýhugsan, sigur stjórin á Bakkafrosti. 

Hóast stjórin er vónríkur um orðini hjá ES-nevndarforkvinnuni, so væntar hann ikki, at úrslit síggjast alt fyri eitt.

- Nú liggur eitt stórt arbeiði fyri framman, og tað má onkur gera. Hóast hon nú hevur verið her á vitjan, so kemur ein slík atgongd ikki av sær sjálvum. Men hetta er í øllum førum eitt stig rætta vegin, sigur stjórin á Bakkafrosti afturat. 

Tú kanst hoyra samrøðuna við Regin Jacobsen her: