Fegnast um viðurkenning av broti á kappingarlóg

Tað sigur Gudny Langgaard, stjóri í Nema, nú semja er gjørd millum Føroya Tele og Kappingareftirlitið.

Tað kostaði Nema rættiliga nógv, tá ið fjarskiftisfyritøkan í apríl 2018 kom við einum nýggjum tilboði um at flyta óbrúkt data til næsta mánað, og Føroya Tele svaraði aftur bara eina viku seinni við at bjóða sínum kundum ókeypis 100 GB dáta til árslok. Nema segði seg síðani vera noytt at bjóða sama tilboð fyri ikki at missa kundar. 

Nema klagaði til Kappingareftirlitið, og Føroya Tele hevur nú gjørt semju við Kappingareftirlitið, har fjarskiftisfyritøkan váttar, at hon hevur brotið kappingarlógina við at misbrúka sína ráðandi marknaðarstøðu mótvegis Nema. Føroya Tele hevur játtað at rinda eina bót í hesum sambandi. Kappingareftirlitið ásetti tá bótina til 18 milliónir krónur, men Terje Sigurðsson, stjóri í Kappingareftirlitinum, sigur, at bótin er væl minni, uttan tó at vilja siga upphæddina.