300 hornblásarar á palli í Fuglafirði

Fuglafjarðar Hornorkestur er vertur, og hini orkestrini eru Havnar Hornorkestur, Klaksvíkar Hornorkestur, GHM, Sørvágs Tónleikarfelag, Kvinnuorkestrið, Nes Sóknar Musikkfelag, Tvøroyrar Hornorkestur, Ælabogin, Eiðis Ljómfelag og so danska Skanderborg Brass Band.

- Musikkstevnurnar hava skapt mong vinarbond og fleiri hava møtt hvørjumøðrum fyrstu ferð her, og hesin dagurin fer burturav til at nørdast við horntónleiki, sigur Rúni Abrahamsen.

Hann er sjálvur fuglfirðingur og byrjaði sum hornblásari í Fuglafjarðar Hornorkestri, sum pápi hansara, Arnhold Abrahamsen, var við til at seta á stovn í síni tíð. Seinnu mongu árini hevur Rúni spælt við Havnar Hornorkestri.

Í sínum dagliga yrki er Rúni Abrahamsen arkitektur, so hann hevur eisini teknað nýggja skúlan í Fuglafirði, so hann var spentur uppá, at hoyra, hvussu stóra høllin fór at roynast, nú øll orkestrini skuldu spæla har seinnapartin í dag.

- Av tí at skúlastovur og onnur høli liggja upp at høllini, er hon sera væl egnað, tí her er bæði pláss fyri hornblásarum, lurtarum og øðrum, tá ið stór tiltøk sum hetta eru, ið krevja munandi meira pláss enn annars, sigur hann.

Musikkstevnurnar hava verið uttan slit síðan 1966, so tann í ár er nummar 58 í røðini.

Hoyr samrøðu við Rúna Abrahamsen: