Norski uttanríkisráðharrin: Útlit fyri vápnahvíld í Gasa eru vánalig

Útlitini fyri, at Hamas og Ísrael semjast um vápnahvíld í Gasa nú, eru vánalig.

Tað sigur norski uttanríkisráðharrin, Espen Barth Eide, við norska kringvarpið.

- Fleiri uppskot eru gjørd, og partarnir hava viðgjørt tey. Men skal eg vera erligur, so tykist tað ikki, sum um vit eru á gáttini til framstig, tíverri. Og tað er ræðuligt, tí hvør dagur við ongari vápnahvíld hevur við sær, at fleiri verða dripin, uttan at nøkur framstig eru fyri friði, sigur Eide við NRK.

Langt millum partarnar

Langt er framvegis millum partarnar í spurningum um endamálið við vápnahvíldini, sigur Eide.

- Framstig hava verið nú og tá, men vit hava higartil onga avtalu um vápnahvíld, sigur hann.

Norski uttanríkisráðharrin er í løtuni í Riyadh í Saudi Arabia í sambandi við eina friðarætlan fyri Palestina.