FIFA atkvøður ikki um at koyra Ísrael úr altjóða kappingum

Limalondini í altjóða fótbóltssamgonguni FIFA fara ikki at atkvøða um at koyra Ísrael úr altjóða fótbóltskappingum.

Palestinska fótbóltssambandið PFA hevði annars sent uppskot inn til FIFA um at útihýsa Ísrael í sambandi við stríðið í Gasa. Sambært PFA brýtur Ísrael fleiri reglur hjá FIFA við at føra stríð í Gasa.

Men á ársfundinum hjá FIFA, sum er nú um vikuskiftið í Bangkok, var í dag staðfest, at tað verður eingin atkvøðugreiðsla um málið.

FIFA-ráðið taka støðu

Í staðin skal FIFA-ráðið - tað sum fyrr æt aðalnevndin - taka støðu til spurningin. Men fyrst skal ein løgfrøðilig meting gerast fyri at vita, um Ísrael veruliga hevur brotið reglurnar hjá FIFA.

BBC skrivar, at FIFA-forsetin Gianni Infantino segði á ársfundinum í dag, at FIFA-ráðið kemur saman á einum serligum fundi síðst í juli at umrøða málið.

- Fótbóltur eigur ongantíð at gerast gísli hjá politikkinum, og skal altíð standa fyri friði, vón og tí góða og sum ein megi, ið sameinir heldur enn skilir fólk, segði Gianni Infantino í dag.