Lærarafelagið tekur undir við at avmarka fartelefonnýtsluna í skúlanum

Lærarafelagið tekur sum heild undir við uppskotinum hjá Djóna Nolsøe Joensen, landsstýrismanni, um fartelefonir í skúlatíðini hjá fólkaskúlanum.

Í uppskotinum um kunngerð verður mælt til at avmarka fartelefonnýtsluna.

Í uppskotinum er tó ikki forboð fyri at brúka fartelefon í skúlatíðini. Men leiðslan í skúlunum skal gera reglur um fartelefon.

Mælt verður til, at bæði námsfrøðiliga ráðið og næmingaráðið verða hoyrd og kunnu siga sína hugsan um tær dagføringar, sum vera gjørdar í atferðarreglunum í skúlanum.

Undantøk undir serligum umstøðum

Lærarafelagið heldur, at námsfrøðiliga ráðið og skúlaleiðarin eiga at veita skúlastýrinum ráð.

Næmingaráðið skal hava uppskotið um reglur til ummælis.

Lærarafelagið mælir til at broyta kunngerðina, so næmingar skulu sum meginreglu ikki brúka fartelefon í skúlatíðini. 

Undantøk eiga at vera í sambandi við serligar umstøður hjá næminginum og undirvísingarstøður, har lærarin metir, at fartelefon er hent. 

Hoyringarfreistin um uppskotið var til 16. mai.