Stoltenberg: Kortanei til russiskt friðaruppskot

Jens Stoltenberg, aðalskrivari í Nato, sigur kortanei til friðaruppskotið hjá Russlandi.

- Hetta er ikki eitt uppskot um friðartingingar, men eitt uppskot, sum fer at hava við sær størri herseting av ukrainskari jørð.

Russiski forsetin Vladimir Putin sigur í dag, at tekur Ukraina seg aftur úr Zaporizjzja, Kherson, Donetsk og Luhansk-landspørtunum, og tekur umsóknina um limaskap í Nato aftur, so er landið til reiðar at gevast við álopunum, og fara undir friðartingingar.

Aðalskrivarin í Nato, Jens Stoltenberg, sigur tvørturímóti, at málið hjá Russlandi er at taka valdið í Ukraina.

Í morgin er friðartoppfundur í Sveis, har fleiri enn 90 lond og felagsskapir fara at kjakast um møgliga loysn á krígnum í Ukraina.