Hvalbingar vrakað uppskot um kommunusamanlegging

Tað gjørdist ein valgysari í Hvalba í kvøld.

Fólk í Hvalbiar kommunu fóru nærum øll á val, vallutøkan var 93 prosent*, og úrslitið gjørdist ikki greitt, fyrr enn atkvøðurnar úr Sandvík vóru taldar uppí. Og æltanin um at stovna Suðuroyar kommunu saman við Tvøroyrar kommunu hevur ikki undirtøku millum fólkini í Hvalbiar kommunu. Tað er greitt, nú úrslitið er kunngjørt av valnevndini.

189 av veljarunum søgdu ja til at leggja saman við Tvøroyrar kommunu, men 220 veljararar søgdu nei.

Hetta svarar til 46 prosent fyri og 54 prosent ímóti.

Fólkaatkvøðan í dag er vegleiðandi fyri bygdarráðini, men Janus Thomsen, borgarstjóri í Hvalbiar kommunu, segði í Degi og viku í gjár, at hann fór at virða fólkaatkvøðuna, hóast hann sjálvur helt, at tíðin var tann rætta at leggja saman við Tvøroyrar kommunu.

*Rætting 16. juli 2024: Valluttøkan í Hvalba var 81,3 % og ikki 93 %, sum annars stendur í greinini.