Veljarakanning: SF er størri enn Javnaðarflokkurin

Sosialistiski Fólkaflokkurin í Danmark er nú størri enn Javnaðarflokkurin.

Ein kanning, sum Voxmeter hevur gjørt, vísir, at var val nú, hevði SF fingið 18,8 prosent av atkvøðunum, skrivar Ritzau.

Javnaðarflokkurin hevði fingið 18,4 prosent, og tað er fyrstu ferð í nærum 10 ár, at sosialdemokratarnir ikki eru størstir í eini veljarakannig. 

Á fólkatingsvalinum í 2022 fekk Javnaðarflokkurin 27,5 prosent av atkvøðunum. 

SF fekk 8,3 prosent. 

Óvissan í kanningini er 2,4 prosent. 

Mette Frederiksen - Mynd: RitzauScanpix

Mette Frederiksen, forsætisráðharri. Flokkur hennara hevur stóra afturgongd, og sambært veljarakanningini hjá Voxmeter er Javnaðarflokkurin nú minni enn SF. (Mynd: Ritzau Scanpix)

Gongur aftur á hondina

Javnaðarflokkurin hevur ikki havt so lítla undirtøku, síðani hann skipaði stjórn saman við Vinstraflokkinum og Moderatunum eftir valið í 2022. 

Flokkurin hevur heldur ikki staðið seg so illa í eini veljarakanning, síðani Mette Frederiksen gjørdist forkvinna.

Meðan Helle Thorning-Schmidt var forkvinna í Javnaðarflokkinum, vóru kortini tíðarskeið, at flokkurin stóð seg verri í veljarakanningum.

Í 2013 vísti ein kanning hjá Voxmeter, at Javnaðarflokkurin fekk 15,8 prosent.

Mette Frederiksen hevur verið forkvinna síðani 2015.