Betongið er ov vánaligt at festa glaspláturnar á

Verða glaspláturnar á umsitingarbygninginum hjá løgtinginum settar uppaftur, byrjar tað arbeiðið 1. apríl næsta ár.

Betongið er kannað. 

Niðurstøðan er, at tað er ov vánaligt til at festa pláturnar beinleiðis á tað, sigur Johnhard Klettheyggj, løgtingsstjóri.

So ein onnur loysn má finnast.  

Landsverk arbeiðir í løtuni við málinum fyri løgtingið.

Tilboð um ársskiftið

Ætlanin er, tá summarfrítíðin er farin afturum, at fáa ein ráðgeva at standa fyri útbjóðingini. Tilboðini skulu vera komin um ársskiftið.

Fyribils standa glaspláturnar í kjallaranum í bygninginum hjá Havnar arbeiðarafelag, sum løgtingið leigar.

Pláturnar vóru tiknar niður í apríl og mai.

Beint fyri ólavsøku í fjør duttu petti av einari plátu niður á gongubreytina við Tinghúsvegin.

Og fyrr í fjør summar datt ein pláta av á hinari síðuni á bygninginum. 

Glaspláturnar komu í 2006.