- Tíðindi, mentan og ítróttur
EM í fótbólti: Risar bresta saman
Fótbóltsrisar bresta saman í fyrstu fjórðingsfinalunum í EM-endaspælinum í Týsklandi, sum verða spældar í dag.
Týsku vertirnir spæla ímóti Spania í Stuttgart seinnapartin, og í Hamburg bresta Frakland og Portugal saman í kvøld. Kringvarpið vísir seinna dystin klokkan 20:00.
Royndi Kroos ímóti fesku sponsku álopsmaskinuni
Týskland hevur staðið seg væl higartil. Einasta minusið í karakterbókini higartil er javnleikurin ímóti Sveis í triðja dystinum í bólkaspælinum. Í áttandapartsfinaluni sendi Die Mannschaft Kasper Hjulmand og Danmark úr kappingini, og heimaliðið - við Toni Kroos sum dirigenti á miðvøllinum - fer at royna at gera tað sama ímóti Spania.
Nico Williams (t.h) og bert 16 ára gamli Barcelona-vongurin, Lamine Yamal, hava staðið fyri besta álopsspælinum í EM-endaspælinum. MYND: Wolfgang Rattay/Reuters/Ritzau Scanpix
Tað verður óivað ein torfør uppgáva. Spania er einasta landið, sum hevur vunnið allar sínar dystir higartil, og við Nico Williams og bert 16 ára gamla Lamine Yamal á odda, hava spaniólar helst víst besta og vakrasta fótbóltsspælið í hesum endaspælinum.
Stórstjørnurnar hittast
Kylian Mbappé og Cristiano Ronaldo eru saman við Lionel Messi størstu fótbóltsstjørnurnar yvirhøvur. Ikki nóg mikið við tí; portugisiski framherjin er stóra fyrimyndin hjá franska úrmælinginum, men bert ein av teimum sleppur at halda fram í kappingini.
Cristiano Ronaldo er stóra fyrimyndin hjá grímuklædda Kylian Mbappé. Í kvøld kann franski framherjin senda portugisan úr kappingini. MYND: Kenzo Tribouillard/AFP/Ritzau Scanpix
Hvør skal halda fram og hvør skal heim verður greitt í kvøld, tá Frakland og Portugal spæla í Hamburg. Við Didier Deschamps á síðulinjuni er Frakland nærum ógjørligt at skora ímóti, men álopsspælið hevur ikki riggað væl higartil. Les Bleus hava bert fingið trý mál í kappingini; tvey teirra hava verið sjálvmál.
Cristiano Ronaldo hevur einki mál skotið enn. Hann fekk kjansin frá brotssparksblettinum ímóti Slovenia, men Jan Oblak bjargaði. Í brotssparkskappingini seinni í dystinum var superstjørnan úr Al Nassr kortini trygg, og Diogo Costa tók sær av øllum trimum skotunum frá slovenum.
Í kvøld er brotssparkskapping neyvan heilt ósannlík.
EM-fjórðingsfinalur:
Kl. 17:00 Spania - Týskland
Kl. 20:00 Portugal - Frakland