Noreg: Tíggjufalda framleiðslu av lóðri og rakettum

Norska verjan hevur vegna norsku stjórnina gjørt avtalu við Nammo, um at tíggjufalda framleiðsluna av lóðri og rakettum fyri meira enn eina milliard norskar krónur.

Nammo bindur seg til at halda framleiðslustigið í minsta lagi 15 ár.

Avtalan við Nammo í Raufoss í Noregi hevur við sær, at fyritøkan ger íløgur í nýggja framleiðsluskipan, sum kann tíggjufalda framleiðsluna av mest framkomnu spreingiknøttunum hjá norsku verjuni.

- Hetta er stórt framstig fyri Raufoss, sigur stjórin í Nammo-samtakinum, Morten Brandtzæg.

Fleiri arbeiðspláss

Stóra framleiðslan merkir eisini fleiri arbeiðspláss, sigur hann.

Nammo tvífaldar eisini orkuna at framleiða annað lóður og rakettmotorar.

Bjørn Arild Gram, verjumálaráðharri, er í Washington, og har boðaði hann frá tíðindunum.

Bjørn Arild Gram - Mynd: NTB

Bjørn Arild Gram er norskur verjumálaráðharri. (Mynd: NTB)

Tvey høvuðsmál

Hann nevndi tvey høvuðsmál í hesum sambandi:  at kollektiva verjan verður styrkt og framhaldandi stuðul til Ukraina. Tí báðir partar hava tørv á størri framleiðslu av verjuútgerð, av lóðri og vápnum.

- Lóðrið fer til norsku verjuna, men verður eisini sent til onnur lond, sum Noreg hevur avtalu við, sigur Brandtzæg.

900 fólk arbeiða hjá Nammo í Raufoss, sum er 120 km norðan fyri Oslo.