Fara at kanna fruktbærið hjá pørum í Føroyum

- Í heyst fara vit at senda spurnabløð til kvinnur í 30-unum, har endamálið er at granska fruktbæri hjá føroyskum kvinnum. Hon verður næstan meinlík eini kanning frá 2005, so vit kunnu samanbera, sigur Pál Weihe, professari og granskari á Heilsugranskingareindini í Sjúkrahúsverkinum.

Orsøkin eru tey seinastu tølini frá Hagstovu Føroya, sum vísa eina greiða gongd - talið á nýføðingum minkar.

Taka við mai mánað sum útgangstøði, so vórðu 60 børn fødd í mai mánaði í 2021, 52 í 2022, 50 í 2023, men bara 43 børn vóru fødd í mai í ár.

Spurningurin er, hví hetta hendir, og ein kanning um fruktbæri kann geva nakað av svarinum.

Pál Weihe

Pàl Weihe, professari og granskari á Heilsugranskingareindini í Sjúkrahúsverkinum. (Savnsmynd)

Kanningin tekur støði í, hvussu long tíð gongur frá tí, at kvinnan ger av, at hon vil hava barn, til hon verður við barn. Tað sigur nakað um fruktbæri.

Men so kunnu tað vera aðrar orsøkir eisini. Er tað tí, at foreldrini ikki hava ráð at fáa børn, at tey stúra fyri støðuni í samfelagnum ella heiminum, ella kanska okkurt heilt annað. 

Pál Weihe sigur, at spurnabløðini verða send til kvinnur í 30-unum umvegis Mín Boks.

- Hetta ger tað munandi lættari hjá okkum. Fólk í dag hava ikki trupulleikar við tí talgilda pallinum, sigur Pál Weihe.