Fiskamarknaðurin: Fýra frystilínuskip undir Føroyum

Fýra frystilínuskip eru við Føroyar, eitt er við Grønland, eitt er á Flemish Kap og eitt siglir heim av Flemish Kap. 

Trý liggja við bryggju, og tað gera bæði ísfiskalínuskipini eisini, sigur Fiskamarknaðurin.

Um útróður nú í vikuni sigur Fiskamarknaðurin, at streymurin verður brúkiligur, og veðrið verður gott.

Nógvir útróðrarbátar eru á Føroya banka, nakrir royna við snellu og aðrir við línu.

Ein djúpvatnstrolari fiskar tosk á Íslandsrygginum.

Í bretskum sjógvi

Tveir ísfiskatrolarar og ein frystitrolari eru í bretskum sjógvi. Teir fiska svartkalva, men hava smáligt fiskarí.

Um partrolarar sigur Fiskamarknaðurin, at fýra pør fiska upsa og annan hvítfisk og eitt par fiskar tosk á Íslandsrygginum. 

Tvey pør fiska gulllaks. Upsafiskaríið er nú brúkiligt. 

Tríggir trolbátar eru norðanfyri og fiska mest tosk og so nakað av hýsu og flatfiski. 

Ein er á landleiðini. Hann fiskar mest flatfisk og tosk. Fiskaríið hjá trolbátunum er brúkiligt. 

Tvey garnaskip fiska svartkalva, og eitt fiskar havtasku. Tey hava smáligt fiskarí, sigur Fiskamarknaðurin.