Spyr aftur, hvussu nógv miðfyrisitingin kostar

Fyrsti grein 52a spurningurin í hesari tingsetuni er longu komin.

Bárður á Steig Nielsen, løgtingsmaður, spyr Aksel V. Johannesen, løgmann, hvussu nógv miðfyrisitingin kostar.

Hann vil hava at vita, hvussu nógv aðalráðini kostaðu árini 2019 til 2023.

Bárður á Steig Nielsen sigur, at hann spurdi um tað sama í undanfarnu tingsetu, men fekk ikki svar.

- Løgmaður svaraði ikki, hvussu nógv miðfyrisitingin kostar í krónum um árið, sigur Bárður á Steig Nielsen.

- Tá henda samgongan kom, segði løgmaður, at miðfyrisitingin skuldi ikki kosta meira, sigur tingmaðurin.

Nú hálvtannað ár er liðið, er lýst eftir fólki til fleiri nýggj størv í miðfyrisitingini, og tríggir nýggir aðalstjórar eru settir. 

Í farnu tingsetu vóru 141 grein 52a spurningar.