Summarfestivalurin byrjar í dag

Næstu dagarnar fer ein rættiliga fittur partur av Føroya fólki at uppihalda seg í Klaksvík, tí í dag byrjar ársins Summarfestivalur. 

Vanliga verður sagt, at okkurt um 10.000 fólk vitja festivalin. 

Summarfestivalurin byrjar klokkan trý seinnapartin við skrúðgongu og gøtukarnevali. Har vera pyntað børn, dansandi ungdómur, Silvi, Bubu, Gula Bamsan, brandbilur og kreativir festivalgestir. 

Børn og barnsligar sálir eru vælkomin í skrúðgonguna, sigur Summarfestivalurin.

Nógv á skránni í Silvalandi

Silvalandið verður aftur í ár í ítróttarhallunum við tónleikapalli, hoppiborgum, ballónlandi, boingbóltum, pinkuøki, gandakendum djóraheimi, víkingabygd og mangt annað. 

Silvaland er opið festivaldagarnar frá kl. 15.00 til 19.00.

Og festivaldagarnir eru í dag, í morgin og leygardagin.

>>Sí eisini: 10 ting tú mást hoyra á Summarfestivalinum