Danny & the Veetos vinna sær alsamt fleiri fjepparar úti í heimi

Danny & the Veetos hava ikki færri enn fimm sangir við sær í skjáttuni, nú teir vitja Studio 5.

Á skránni eru bæði stór hitt, ið hava nøkur ár á baki, og eisini spildurnýggir tónar.

Manningin er: Danny Baldursson: sang, gittar, banjo og sigarboks. Rúni Hentze: trompet. Josh Cana: bass og tangentar og Fríði Bjarkhamar: slagverk.

Fríði Bjarkhamar

Tilfarið hjá Danny og teimum er áleið helvt um helvt føroyskt og enskt.

Føroyingum dámar best, tá sungið verður á móðurmálinum, men uttanlands riggar okkara popptónleikur kanska best á enskum, metir Danny Baldursson.

Tó eru undantøk, tí eitt nú sangurin Sunnukvøld í mai hevur nógar lurtarar uttanlands. Til dømis í Ungarn.

Í løtuni er hann næstmest stroymdi sangur hjá Danny & the Veetos á Spotify.

Allright er enn nummar eitt, men í hesum døgum verða fleiri spælingar skrásettar hjá Sunnukvøld í mai.

Tí er ikki óhugsandi, at hann tekur seg fram um áðrenn langt umlíður.

Rúni Hentze

Á stroymingartænastunum ber til at fylgja neyvt við, hvar fólk, ið lurta, eru stødd.

Áhugavert er at staðfesta, at í lítlari bygd í Skotlandi, hevur bólkurin nógvar spælingar.

Tað man vera ein skotskur stórfjeppari, tí limirnir halda ikki, at nakar føroyingur býr har.

Josh Cana

Í løtuni er Danny Baldursson tann einasti í bólkinum, ið er yrkistónleikari.

- Eg eri takksamur fyri, at eg eri so nógv umbiðin, sigur hann, og sipar eitt nú til tær mongu veitslurnar, ið hann verður bókaður til.Men hvør veit, um tað í framtíðini ikki kann gerast yrkisleið hjá hinum eisini, tí dreymurin um stóra altjóða frambrotið livir enn.

Beinleiðis úr Studio 5

Hvat: Beinleiðis úr Studio 5
Hvar: Í útvarpinum og á KVF Ljóð
Nær: Fríggjamorgun kl. 9.05, og tá tað passar tær á KVF Ljóð
Hesa ferð: Danny & the Veetos