Ferðslan til og úr Mykinesi í summar nógv tarnað av vánaligum veðri

Aftur í dag er neyðugt at avlýsa siglingina til og úr Mykinesi, og túrarnir hjá Jósupi úr Sørvági í morgun og nú eftir døgurða eru eisini avlýstir fyri veður. 

Yvirhøvur hevur ferðslan til og úr Mykinesi í summar verið nógv tarnað av vánaligum veðri í summar, sigur Tummas Henriksen, stjóri í smápartafelagnum Mykines, sum røkir farleiðina fyri Strandferðsluna við ferðafólkabátinum Jósupi. 

"Bara í juli vóru níggju túrar avlýstir, so tá vóru tað umleið 1.400 fólk, sum ikki sluppu út til Mykinesar. Einu ferðina mátti tyrlan eftir fólki, sum ikki sluppu inn aftur við bátinum."

Tummas Henriksen leggur afturat, at útlitini fyri sigling til Mykinesar restina av vikuni eru ikki góð.