Ringt veður er grønt veður

Elframleiðslan í Føroyum hevur í stóran mun verið grøn í august. Serliga seinastu vikuna hevur verið gott grønt orkuveður. Av samlaðu framleiðsluni frá 13. til 19. august vóru sløk 60 prosent vindorka og sløk 25 prosent vatnorka. 

Best stóð til í grønum veðri leygardagin 17. august. Tá brúkti SEV onga olju. Øll nýtt elorka í Føroyum var grøn leygardagin. Vindur stóð fyri 65,16 prosentum av elframleiðsluni, vatn fyri 33,59 prosentum og biogass var 1,25 prosent.

Í Suðuroynni var elframleiðslan 100 prosent grøn, bæði leygardagin og sunnudagin, vísa hagtøl hjá SEV.

Orkuframleiðslan hevur ligið millum 45 og 52 MW í meginøkinum síðstu dagarnar. Í Suðuroynni hevur orkuframleiðslan ligið millum 3,25 og 5,96 MW. Elskipanin í Suðuroynni er óheft av restini av Føroyum.

Fleiri hagtøl um orkuframleiðslu kunnu síggjast á sev.fo.