- Tíðindi, mentan og ítróttur
Uppskot um at stuðul úr statskassanum skal bara brúkast í Føroyum
![](https://kvf.fo/sites/default/files/styles/grein-ovasta-mynd/public/folkatingid2.jpg?itok=Wyg_ryMZ)
Stuðulin, sum tey fáa, sum eru vald í fólkatingið, skal bara kunna brúkast til politiskt arbeiði í Føroyum.
Av misgáum var lógin um stuðul til flokkar og uttanflokkavalevni, sum eru í fólkatinginum, ikki kunngjørd í Føroyum, tá hon kom í gildi í 1987.
Nú skal hon so kunngerast í Føroyum.
Uppskot um ríkislógartilmæli kom um tað í løgtingið í gjár.
Lógin er tó brúkt í Føroyum, hóast hon ikki hevur verið í gildi her.
Steðgaði í 2022
Hon er brúkt fram til á heysti 2022, tá fólkatingsval var seinast.
Tey, sum fáa minst 1000 atkvøður á fólkatingsvali, fáa stuðul.
Men nakrar broytingar koma nú.
Stuðulin kann í framtíðin bara brúkast til politiskt arbeiði í Føroyum og ikki, sum higartil, í øllum ríkinum.
Og revsing verður fyri at geva skeiva váttan um væntaðar og hildnar útreiðslur til politiskt arbeiði.
Hetta hevur higartil ikki verið galdandi í Føroyum.
Bara um Føroyar vilja
Fólkatingið vil tó bara broyta hetta, um Føroyar vilja tað.
Landsstýrið vil, at markið, sum er 1000 atkvøður, verður lækkað.
Tað vil stjórnin ikki.
Hon heldur, at sama mark skal vera í Føroyum og Grønlandi.
Uppskotið hevur verið til ummælis hjá øllum flokkum í Føroyum, Gjaldstovuni og Landsgrannskoðanini.
Einki ummæli kom.