- Tíðindi, mentan og ítróttur
Nadoddur holvdur: Fimm persónar bjargaðir, men ein er druknaður
![](https://kvf.fo/sites/default/files/styles/grein-ovasta-mynd/public/nadoddur.jpg?itok=5pTubnzx)
Seks fólk mannaðu opna, føroyska seksæringinNadodd, tá hann leygardagin loysti av Tvøroyri við kós móti Noregi.
Ferðin hevur gingið væl inn til í dag, tá Nadoddur kom í havsneyð. Norska sjóverjan var longu við tyrlu hjá Nadoddi seinnapartin, men sambært vaktleiðaranum hjá MRCC, so høvdu fólkini umborð givið tekin um, at alt stóð væl til.
Men um seks tíðina í kvøld fekk MRCC boð frá norsku sjóverjumynduleikunum um, at Nadoddur var holvdur.
Fimm av manningini vóru í einum gummibáti, men tann sætti var saknaður.
Klokkan 20 fekk MRCC at vita, at norska sjóverjan hevði lokaliserað øll seks fólkini, og at tann sætti lá undir bátinum, druknaður.
Ringt veður tarnar bjargingini
Vaktleiðarin á MRCC, Jóhan Müller, greiðir frá, at klokkan 20.30 vóru trý av teimum bjargaðu fólkunum á veg í tyrlu til Florø. Tey vóru væl fyri kropsliga, men sálarliga sera merkt av støðuni. Tvey onnur fólk vóru á veg sama veg í einari aðrari tyrlu.
Roynt var av øllum alvi at fáa fatur í druknaða persóninum, ið lá undir Nadoddi, men tað eru sera keðilig líkindi á staðnum - 25 metrar um sekundi, og aldurnar eru fýra til fimm metrar høgar, og nú er eisini myrkt.
Eitt videobrot, ið bjargingarfelagið "Redningsselskapet" hevur lagt út á sosiala miðilin X frá bjargingarbátinum "Idar Ulstein", sum er á hjá Nadoddi, vísir, hvussu ringt veðrið er.
#Redningsskøyta «Idar Ulstein» er på nå på stedet hvor vikingskipet har kantret vest av #Stad. Vi holder øye med skipet, og gjør det vi kan for å bistå med bergingen, men værforholdene gjør det svært krevende. pic.twitter.com/iLUUeo6Qoz
— Redningsselskapet (@NSSR) August 27, 2024
Fleiri skip, bjargingarbátar og tvær tyrlur luttaka í bjargingini, og Jóhan Müller, vaktleiðari, sigur, at bjargingin heldur fram til tann sætti persónurin, ið liggur undir bátinum, er fingin til lands.
Kontaktpersónurin hjá Nadoddi hevur fingið boð, staðfestir vaktleiðarin.
Jóhan Müller, vaktleiðari, greiddi fyrr í kvøld soleiðis frá bjargingini.