Meira enn helvtin av útróðrarflotanum er eldri enn 30 ár

Størra helvtin, 62 prosent, av teimum útróðrarbátum, sum reka vinnuligan fiskiskap, eru eldri enn 30 ár.

Tað siga tøl hjá Sjóvinnustýrinum.

Tey vísa, at útróðrarflotin er gamal, og hann verður als ikki endurnýggjaður. 

60 útróðrarbátar reka vinnuligan fiskiskap.

Bara fimm eru komnir aftrat hesum flotanum seinastu 20 árini.

Fáir hava siglingarloyvi

Sera fáir vinnuligir útróðrarbátar hava galdandi siglingarloyvi.

Sjóvinnustýrið sigur, at í bólki 5A sigla bara 36 prosent lógliga.

Í bólki 5B, sum er fyri teir, sum fiska fyri meira enn 200.000 krónur, sigla bara 39 prosent lógliga.

Tað er eitt krav, at hesir bátar verða sýnaðir, áðrenn Sjóvinnustýrið gevur teimum siglingarloyvi.

Trygdin var nógv betri, um tað galdandi siglingarloyvi var kravt, áðrenn útróðarbátur fekk fiskiloyvi.

Støðan er als ikki í lagi, sigur Sjóvinnustýrið, sum fer at rætta skeivleikan.