Michel Barnier verður nýggjur forsætisráðharri í Fraklandi

Franski forsetin, Emmanuel Macron, hevur tilnevnt konservativa politikaran, Michel Barnier, forsætisráðharra, skrivar Reuters.

Fremsta uppgávan hjá Barnier verður at skipa nýggja stjórn eftir tjóðartingsvalið í Fraklandi í juli.

Eingin av teimum trimum politisku blokkunum fekk meiriluta á valinum, og síðani hevur verið stór óvissa um, hvør skuldi skipa stjórn.

73 ára gamli Michel Barnier stóð á odda fyri samráðingunum hjá ES við Bretland um Brexit, og hann hevur í tveimum umførum verið ES-nevndarlimur.