- Tíðindi, mentan og ítróttur
Uppskot um vakmyndatól kemur ikki fyrr enn næsta ár
![](https://kvf.fo/sites/default/files/styles/grein-ovasta-mynd/public/vlcsnap-2023-04-24-13h34m03s928.png?itok=ufAo8J0U)
Í fyrsta lagi um eitt ár fær løgtingið lógaruppskot um at loyva kommunum at seta upp vakmyndatól á serliga ábærum støðum.
Bjarni Kárason Petersen, landsstýrismaður, sigur, at Løgmálaráðið arbeiðir við nógvum lógaruppskotum, sum skulu í tingið i hesari tingsetuni.
Tí er ivasamt, um uppskotið um vakmyndatól kemur í hesi tingsetuni.
- Men eg vænti, at uppskot kann koma í tingið á heysti 2025, sigur landsstýrismaðurin.
Virðir løgtingssamtyktina
Løgtingið samtykti í mai eitt uppskot hjá Sambandsflokkinum, sum heitti á landsstýrið um at koma við uppskoti um kommunur og vakmyndatól.
Helgi Abrahamsen, tingmaður, spurdi, um landsstýrismaðurin ætlar at fylgja løgtingssamtyktini.
Bjarni Kárason Petersen sigur, at sjálvandi virðir hann løgtingssamtykina.
Málið er sett á dagsskránna hjá Løgmálaráðnum.
Bjarni Kárason Petersen sigur seg umhugsa, um vakmyndatólini skulu hava eina royndartíð, til dømis í fimm ár.