Íslendsku meistararnir spæla kanska heimadystir á Tórsvølli

Kanska fara íslendsku meistararnir í fótbólti, Víkingur í Reykjavík, at spæla sínar heimadystir í Conference League-kappingini á Tórsvølli í Havn.

Tí vøllurin hjá Víkingi lýkur ikki krøvini hjá UEFA, og spurningurin er so, um undantak kann fáast.

Tað veit Fotbolti.net at siga.

Víkingur, sum er felagið hjá føroyska landsliðsspælaranum, Gunnari Vatnhamar, hevur spurt og fingið váttan fyri, at Tórsvøllur kann leigast.

Eisini hevur íslendska felagið longu boðað UEFA frá, at Tórsvøllur kann gerast loysnin.

Tríggir heimadystir

Víkingur hevur heimadystir 24. oktobur, 7. novembur og 12. desembur. 

Ein annar møguleiki er at brúka vøllin í Kópavogi, men tá skulu ljós og annað leigast, so tað fer at kosta tað sama sum at spæla í Føroyum, verður sagt. 

Spælast kann eisini á tjóðarleikvøllinum, Laugardalsvølli, men tá krevst, at hitaskipan verður løgd á vøllin fyri at fáa frostið úr honum, og slíka skipan kann Víkingur ikki fíggja einsamallur.

Tá Breiðablik spældi í fjør, vóru býráðið í Reykjavík, landið og fótbóltssambandið við í fíggingini.