Tríggir býráðslimir tikið seg av javnaðarlistanum

- Krúnprinsurin hjá Javnaðarflokkinum í Tórshavnar býráð verður ikki á listanum til býráðsvalið 12. november.

Tað skrivar Norðlýsið í dag.
 
Keldur siga við Norðlýsið, at Tróndur Sigurðsson, Bjørg Dam og Súna Mørk hava tikið seg av listanum. Tey sita øll í býráðnum í dag. 

Suðurstreymoyar Javnaðarfelag hevði uppstillingarfund í gjárkvøldið.

Súna Mørk, Bjørg Dam, Tórshavnar býráð 2021-2024

Súna Mørk og Bjørg Dam. (Mynd: Bjarni Árting Rubeksen)

Heðin Mortensen,Tróndur Sigurðsson, kommunuval 2020, uppteljing

Tróndur Sigurðsson og Heðin Mortensen í ítróttarhøllini á Hálsi valkvøldið í 2020. (Mynd: Bjarni Árting Rubeksen)

Ikki mannaður

Útarpið hevur tosað við formannin í Suðurstreymoyar Javnaðarfelag, sum váttar fundin í gjárkvøldið. 

- Listin er ikki fult mannaður enn, og eg havi onga viðmerking nú, sigur Marni Olsen, formaður við útvarpið í dag.

Tróndur Sigurðsson hevur onga viðmerking.

Umhugsar støðuna

Dagført klokkan 15:46

Bjørg Dam sigur, at hon umhugsar sína støðu.

- Eg umhugsi mínar raðfestingar í framtíðini.. Eg havi gjørt tað, sum eg setti mær fyri í kommunalum høpi, og flestu mál eru komin á lunnin, og tað er so at siga klárt at trýsta á 'play'. Nú skal eg so taka støðu til, hvar eg best leggi mína orku, sigur Bjørg Dam, býráðslimur.

Kristianna Winther Poulsen hevur onga viðmerking til málið. Men hon váttar, at hon stendur á listanum hjá Javnaðarflokkinum.

Tað hevur ikki eydnast okkum at fáa viðmerking frá Súnu Mørk, og heldur ikki frá borgarstjóranum Heðini Mortensen, sum umboðar Javnarflokkin í Tórshavnar býráð.
 

Kári Johansen

Kári Johansen stillar upp fyri Framsókn.

Kári í Framsókn

Seinasta vikuskiftið boðaði ein fjórði býráðslimur fyri Javnaðarflokkin, Kári Johansen, frá, at hann fer úr Javnaðarflokkinum, og at hann nú stillar upp fyri Framsókn.

Í samrøðu við Hilmar Jan Hansen í útvarpinum seinasta sunnudag vísti Kári Johansen á vantandi stev millum seg og borgarstjóran, Heðin Mortensen. 

Hann vísti somuleiðis á, at tað í fleiri førum var hansara egni flokkur, Javnaðarflokkurin, sum var tann tungi parturin at dansa við. 

Serliga er tað Tjóðleikhúsið, har ósemja er um staðsetingina, sum er ein knútur fyri Kára Johansen, segði hann í samrøðuni:

Kári Johansen sigur við útvarpið í dag, at tíðindini um, at fleiri hava tikið av javnaðarlistanum er nýggj fyri sær, og at hann tí hevur hann onga viðmerking.