Fólkaflokkurin hevði vunnið stórt

Í eini nýggjari veljarakanning, sum Spyr.fo hevur gjørt fyri Blaðið hjá Portalinum, hevði Fólkaflokkurin fingið 28,8 prosent av atkvøðunum, sum eru næstan 10 prosentstig meira enn á valinum í 2022.

Tað er ein framgongd upp á heili 52 prosent, sum hevði givið Fólkaflokkinum 10 tingsessir. Hann hevur seks tingsessir nú.

Sambandsflokkurin er eftir kanningini næststørstur við 22,2 prosentum og átta tingsessum, so teir báðir stóru andstøðuflokkarnir kundu einsamallir skipað samgongu.

11 prosent ikki tikið støðu
Javnaðarflokkurin er triðstørstur við 20,4 prosentum og sjey tingsessum, og sum nummar fýra kemur Tjóðveldi við 13,2 prosentum, sum er metlágt og bara givið fýra tingsessir.

Miðflokkurin hevði fingið 7,1 prosent og Framsókn 6,9 prosent, og tað hevði givið teimum tveir tingsessir í part, so Framsókn hevði mist ein tingsess.

Av teimum 500 fólkunum, sum eru spurd í hesi vikuni, hava 11 prosent ikki tikið støðu til, hvar tey høvdu sett krossin.

Meira verður at hoyra um veljarakanningina í tíðindunum á middegi.