Revsimál um hvítvask í rættinum í dag

Føroya rættur viðger eitt revsimál um hvítvask í dag.

Tveir menn úr Danmark eru ákærdir. Teir vóru tiknir á flogvøllinum á veg av landinum.

Teir høvdu góðar 20.000 kr. við sær hvør.

Politiið heldur, at pengarnir stava frá ólógligum virksemi.

Menninir vóru bara nakrar heilt fáar dagar í Føroyum.

Teir nokta seg sekar.

Onnur ferðin, at grein um hvítvask verður brúkt

Hetta er aðru ferð, at grein 290a í revsilógini verður roynd í Føroya rætti. 

Grein 290a sigur, at fyri hvítvasking verður tann revsaður við sekt ella fongsli í upp til eitt ár og 6 mánaðir, sum leggur um ella flytur pening, ið beinleiðis ella óbeinleiðis er vinningur av revsiverdum lógarbroti, til tess at krógva ella káva út yvir tann ólógliga upprunan.

Í hinum málinum fekk ein maður úr Niðurlondum 40 daga treytaða revsing í fjør summar.

Hann hevði stívar 44.000 krónur við sær. Hann var vístur av landinum í trý ár.

Maðurin var einsmallur í Føroyum sum ferðamaður. Hann var her í 14 dagar, og hann játtaði seg sekan.