Føroyar fáa størri toskakvotu á Flemish Kap

Á ársfundinum hjá NAFO, sum endaði í gjár, samdust limalondini at hækka toskakvotuna á Flemish Kap fyri 2025.

Samlaða mest loyvda veiðan eftir toski varð ásett til 12.613 tons fyri 2025, og Føroyar eiga 22,35% av hesi kvotuni.

Tað merkir, at føroyska toskakvotan á Flemish Kap næsta ár verður 2.819 tons. Í 2024 var hon 2.617 tons.

Kvotan hjá Føroyum eftir svartkalva verður 188 tons og fyri kongafisk 69 tons.

Fiskivinnumálaráðið skrivar, at Kanada eisini hevur latið upp aftur fyri fiskiskapi eftir toski á Grand Bank, har veiðubann hevur verið síðan 1993. Her eigur Kanada 95% av Mest Loyvdu Veiðini. Semja var um at lata toskastovnin koma fyri seg komandi árini, og ein kvota varð ásett til hini limalondini, sum í fyrstu atløgu er best egnað sum hjáveiða. Føroyar fáa eina kvotu uppá 20 tons.

Rækjustovnarnir á Flemish Kap og á Grand Bank hava trupult við at koma fyri seg, og limalondini vóru samd um at halda fram við veiðibanninum, sum hevur verið síðan 2022.