Skulu nú gjalda 100 prosent til síni egnu børn

Fólk, sum gjalda uppihaldspening, skulu ikki longur fáa pengar úr landskassanum.

Landsstýrið ætlar at strika stuðulin fyri at spara.

Nú sigur lógin, at tey, sum gjalda uppihaldspening til hjúnarfelaga og ella til børn yngri enn 18 ár, fáa 40 prosent úr landskassanum.

Stuðulin verður bara veittur fyri goldnu upphæddina, sum fer upp um vanliga árliga gjaldið fyri eitt barn.  

Vanligt barnagjald í ár er 1.162 kr. 

Fólk, sum rinda barnagjald fyri trý børn, rinda tí 3.486  kr. um mánaðin.  

Tey fáa tí stuðul til 40 prosent av gjaldinum til tvey børn, tað eru 930 kr. um mánaðin.

Tá broytingin hevur fingið fullan virknað í 2026, er sparingin um árið 2,7 mió, kr.

Tey, sum gjalda uppihaldspening fyri 2024, kunnu søkja um stuðulin fram til 1. juli 2025.

Í fjør fingu 206 fólk stuðul til uppihaldspengar.

Tey vóru 213 í 2022 og 220 í 2021.