Falskar bumbuhóttanir móti indiskum flogfeløgum

Flogfeløg í India hava fingið í minsta lagi tíggju falskar bumbuhóttanir bara seinastu 48 tímarnar. 

Tað hevur darvað flogferðsluna munandi, skrivar bretska kringvarpið.

Í gjár var neyðugt hjá Singapore at senda tvey hernaðar-jetflogfør at fylgja einum flogfari hjá Air India Express burtur úr økjum við nógvum fólki, tí bumbuhóttan hevði verið.

Nakrar tímar frammanundan noyddist eitt flogfar hjá sama felag, sum var á veg úr Delhi til Chicago, at seta seg á einum kanadiskum flogvølli, av trygdarávum.

Tað er ikki óvanligt, at indisk flogfeløg fáa falskar bumbuhóttanir, men enn er ógreitt, hví so nógvar hóttanir hava verið síðani mánadagin. Og arbeitt verður við at fáa greiðu á, hvør hevur sent hóttanirnar.

Umframt Air India hava IndiGo, SpiceJet og Akasa Air eisini fingið falskar bumbuhóttanir hesar dagarnar.