Landsstýrismálanevndin viðger kæruna aftur í dag

Landsstýrismálanevndin viðger kæruna aftur í dag
Formaðurin Hans Jacob Thomsen hevur sagt, at endalig niðurstøða í malinum um Ingilín D. Strøm, landsstýriskvinnu, kemur kanska í dag
Landsstýrismálanevndin fer á fund klokkan níggju at viðgera kæruna um Ingilín D. Strøm, landsstýriskvinnu.
Mynd: Bjarni Árting Rubeksen  
 
22.10.2024 - 08:16

Í morgun klokkan 9 fer landsstýrismálanevndin á fund at viðgera kæruna um landsstýriskvinnuna Ingilín Didriksen Strøm.

Formaðurin Hans Jacob Thomsen hevur sagt, at endalig avgerð kemur kanska í dag.

Jacob Vestergaard hevur kært landsstýriskvinnuna í umhvørvismálum fyri at hava sagt ósatt fyri løgtinginum, tá ið hon segði seg ongar ábendingar hava fingið um, at trupulleikar vóru við langtíðarhaldførinum hjá Bústøðum.

Fyribils niðurstøðan hjá einari samdari landsstýrismálanevnd var, at landsstýriskvinnan hevur sagt ósatt fyri løgtinginum.

Landsstýriskvinnan heldur ikki, at landsstýrismálanevndin hevur prógvað út um allan rímiligan iva, at hon tilvitað hevur sagt ósatt.

Hon heldur, at landsstýrismálanevndin eigur í fyrra lagi at sleppa málinum, og í seinni lagi at fáa løgtingsforkvinnuna at seta kanningarstjóra.

 

Atkvøða um danskan floksstuðul

Tingfundur er eisini í dag.

Atkvøðast skal við aðru viðgerð, um danska floksstuðulslógin skal setast í gildi í Føroyum.

Kunngerðin er ongantíð lýst í Føroyum, og nú ivi var um heimildina, helt danska Innanríkismálaráðið tað vera rættast at steðga stuðulsveitingini fyribils, til lógin er kunngjørd í Føroyum.

Flokkar og listar, sum hava fingið minst 1.000 atkvøður, kunnu søkja um stuðul.

Í ár er stuðulin 35 krónur og 75 oyru fyri hvørja atkvøðu.

Í uttanlandsnevndini vóru umboðini fyri Javnaðarflokkin, Sambandsflokkin og Miðflokkin fyri at samtykkja uppskotið, og umboðini fyri Fólkaflokkin, Tjóðveldi og Framsókn vóru ímóti.

Løgtingið fer eisini at viðgera trý uppskot úr familjupakkanum hjá Fólkaflokkinum. Tey uppskotini verða síðan beind í fíggjarnevndina og mentanarnevndina.

Tingfundurin byrjar klokkan 11.
 

Er kopiera
Nýggjastu sendingar í ÚV
Nýggjastu sendingar í SV
Mikudag 11. juni
Dagur og vika - teknmálstulkað
193101
Týsdag 10. juni
Veðrið
193072
Sunnudag 8. juni
Andakt við Bergi Debes Joensen
192984
Sunnudag 8. juni
Guðstænasta úr Havnar kirkju
192979