UEFA gevur føroyskari eldsál viðurkenning

- Hetta er mín máti at geva fótbóltinum okkurt aftur, tí eg havi sjálvur fingið so ótrúlilga nógv gott burtur úr tíðini, eg spældi fótbólt.

Soleiðis sigur John Eystberg, nú hann hevur fingið stóra viðurkenning frá europeisku fótbóltssamgonguni, UEFA, fyri sítt stóra arbeiði sum fótbóltsvenjari hjá gentum og kvinnum í HB.

Longu sum seks ára gamal fór John Eystberg til sína fyrstu fótbóltsvenjing. 

Líka síðani hevur fótbóltur fylt nógv. Umframt sjálvur at hava spælt fótbólt, hevur John Eystberg seinastu 30 árini verið fótbóltsvenjari.

Seinastu árini hevur hann tikið sær av gentu- og kvinnufótbóltinum í HB. Hvørja viku brúkar hann einar 25 tímar upp á venjing og dystir. Harafturat er alt samskiftið við foreldur, spælarar og onnur, sum hann eisini tekur sær av. 

- Tá tú sært, hvussu nógv fótbólturin og venjingarnar hava at siga fyri hesar genturnar og kvinnurnar, so gevur tað mær orku og áræði at halda fram, sigur John Eystberg.

Í morgunsendingini greiðir John Eystberg eitt nú frá venjarauppgávuni, kvinnufótbólti og viðurkenningini frá UEFA.