Hanni, Randi og Beinir: Takk fyri virðislønina

Beinir Bergsson, yrkjari, sum í gjárkvøldið fekk handað Virðisløn landsins til ungt listafólk 2024, legði í sínari takkartalu áherðslu á, at tað er alneyðugt, at okkurt verður gjørt við svinnandi lesihugin hjá børnum og ungum. Lesihugurin er ein hornasteinur undir fólkaræðinum, staðfesti ungi rithøvundurin. 

Randi Ward, týðari og rithøvundur, ið er ættað úr West Virginia í USA, helt sína takkartalu á flótandi føroyskum. Hon fekk Heiðursgávu landsins 2024 fyri sítt áhaldandi arbeiði og stóra hegni at týða og gera vart við føroyskan skaldskap í útheiminum. 

Hanni Bjartalíð, myndlistamaður, ið fekk Mentanarvirðisløn landsins 2024, er ein maður av fáum orðum. "Eg havi ikki tikið nakra talu við, men eg havi tikið dóttrina," staðfesti Hanni Bjartalíð, sum eisini fegnaðist um tann stóra framburðin í heimstaðnum Klaksvík. "Her, sum vit standa í kvøld í Varpinum, plagdi at renna ein á, ið vit dreingir spældu í. Um heystið, tá slaktið var fyri, flutu vemburnar um beinini á okkum," skemtaði Hanni Bjartalíð.