Grønland boykoyttar Norðurlandaráðið

Grønland boykottar framvegis Norðurlandaráðið, sum í hesari vikuni hevur ársfund í Reykjavík.

Tað ger landið, tí Føroyar, Áland og Grønland ikki sleppa við á týðandi fundir hjá ráðnum. 

Mute B. Egede, landsstýrisformaður, sigur aftur nú, at londini í norðurlendska samstarvinum eru býtt í eitt A-lið og eitt B-lið.

Og tí er grønlendska landsstýrið ikki við á fundunum hjá Norðurlandaráðnum í Reykjavík. 

Ikki minst, tí ársfundurin í ár er um frið og trygd í Arktis, eigur Grønland at vera við í øllum fundum har, sigur landsstýrið.

Landsstýrið endurskoðar nú lut Grønlands í norðurlendska samstarvinum. 

Antin ella ikki

Føroyar eru við í Reykjavík, hóast støða Føroya er tann sama sum tann grønlendska.

Aksel V. Johannesen, løgmaður, endaði sína røðu á ársfundinum í gjár við orðunum:

"Enten er vi helt med, eller også er vi slet ikke med."

Antin eru vit við í øllum, ella eru vit als ikki við.

Í morgin verður atkvøtt um dagføringar í helsingforssáttmálanum, grundlógini hjá norðurlendska samstarvinum.

Ein uppskotin dagføring er at geva Føroyum, Álandi og Grønlandi fullan limaskap í Norðurlandaráðnum.