Hava framvegis ikki valt borgarstjóra í Vági

Enn er eingin valdur í borgarstjórasessin í Vági at taka við 1. januar. 

Ætlanin var annars, at Levi Mørk í Javnaðarflokkinum skuldi vera borgarstjóri, men tá semjuskjalið millum Javnaðarflokkin og Sambandsflokkin skuldi undirskrivast í gjárkvøldið, boðaði Bjarni Johansen úr Javnaðarflokkinum frá, at hann ikki fór at skriva undir.

Kringvarpið hevur allan fyrrapartin roynt at fáa viðmerking frá Bjarna Johansen, borgarstjóra, men hann sigur seg ikki hava nakra viðmerking enn.

Bjarni Johansen

Bjarni Johansen er borgarstjóri í Vági, og sum skilst ætlar hann at halda fram sum borgarstjóri í samgongu við Tjóðveldi eftir 1. januar.

Kringvarpið hevur eisini roynt at fáa viðmerking frá Arna G. Johansen í Suðuroyar syðra javnaðarfelag, Arna Brattaberg, sum er fyrst valdur á lista E, og Bárði G. Nielsen í Tjóðveldi, men teir hava ikki svarað telefonini.

Aksel V. Johannesen, løgmaður og formaður í Javnaðarflokkinum, sigur, at hann vil svara spurningum seinnapartin.

Toppskorari

Levi Mørk, sum hevði eina avtalu um at gerast borgarstjóri í Vági sum toppskorari á Javnaðarlistanum, hevur nú heitt á Javnaðarflokkin um at taka støðu til, hvat skal gerast, nú Bjarni Johansen, sum eisini var valdur á Javnaðarflokkinum, fór í samgongu við Tjóðveldi, og stendur til at halda fram borgarstjóri.

Tá býráðið skuldi skipa seg fyrrapartin, møttu hvørki býráðslimirnir hjá Sambandsflokkinum ella Levi Mørk og Rakul Nolsøe í Lágabø í Javnaðarflokkinum.

Hoyr samrøðu við Levi Mørk í útvarpstíðindunum:

Levi Mørk gjørdist toppskorari á kommunuvalinum í Vági týsdagin við 131 persónligum atkvøðum. Bjarni Johansen var næstfremstur á Javnaðarlistanum við 108 persónligum atkvøðum.

Valið gav Tjóðveldi fýra býráðslimir, Javnaðarflokkinum tríggjar, og Sambandsflokkurin fekk tveir býráðslimir. 

Sostatt manglaði Tjóðveldi ein býráðslim fyri at fáa meiriluta. 

Hann hevur flokkurin nú fingið við Bjarna Johansen.

Og nývalda býráðið er kallað til fundar mikukvøldið kl 18.