Eiga meira í peningastovnum enn tey skylda

Føroyingar hava fleiri pengar í peningastovnunum, enn teir hava í láni haðani.

Innlánsyvirskotið var 1,4 milliardir krónur í september, ein milliard í Føroyum og 400 milliónir uttanlands, skrivar Landsbankin.

Deildin hjá Føroya banka í Grønlandi er tald við. 

Innlánini í føroysku peningastovnunum vuksu 2,4 prosent í september.

Støðugur vøkstur

Vøksturin í innlánum hjá húsarhaldunum er øktur støðugt síðani á vári 2023 og hjá privatu vinnuni síðani á vári í ár.    

Innlánsyvirskotið hjá húsarhaldunum í føroysku peningastovnunum var tríggjar milliardir og 100 milliónir í september.

Men, sigur Landsbankin, verður skuldin, sum húsarhaldini hava í donskum realkredittstovnum tald við, høvdu føroysku húsarhaldini innlánsundirskot, sum var 190 mió. kr. í september í ár.

Innlánini í føroysku peningastovununum vóru 20,3 mia. kr. í september í ár, góðar 800 mió. kr. størri enn í september í fjør, skrivar Landsbankin.