Hava nú skrivað undir keypssáttmála um SMS

Børsskrásetta íslendska samtakið Hagar hf. hevur nú endaliga keypt P/F SMS, og samstundis eru fyrrverandi partaeigararnir í P/F SMS vorðnir partaeigarar í Hagar hf.

Partarnir skrivaðu undir keypssáttmálan í gjár.

Hagar hf. rekur íslendsku Bónus-ketuna, oljufeløg, klædna-handilsketuna Zara og mangt annað serstakt virksemi í Íslandi. Samtaksstjórin í Hagar hf, Finnur Oddsson, fegnast um keypið og bjóðar P/F SMS vælkomnum upp í Hagar-familjuna.

Væl rikin

- P/F SMS er ein væl rikin fyritøka, sum hevur ein týðandi leiklut í Føroyum. P/F SMS bjóðar bíligar gerandisvørur og góðar upplivingar, tá farið verður til handils, og tað er í tráð við missiónina hjá Hagar hf. Vit eru errin av at átaka okkum ábyrgdina at eiga P/F SMS, og vit vilja halda fram at stuðla menning og vøkstri, sum gagnar føroyingum, staðfestir Finnur Oddsson í tíðindaskrivi.

Umsetningurin hjá P/F SMS var umleið 700 milliónir krónur í fjør, og avlopið eftir skatt var 12 milliónir krónur. 700 fólk eru í starvi hjá P/F SMS svarandi til 286 fulltíðarstørv.

Niels Mortensen heldur fram sum stjóri í P/F SMS.