Mælir vinstraveinginum til at stovna nýggjan flokk

Steingrímur J. Sigfússon, fyrrverandi formaður í Vinstra-grøna flokkinum í Íslandi, mælir flokkunum á vinstraveingi, sum ikki rukku upp um tinggáttina hesa ferð, at umhugsa møguleikan saman at stovna nýggjan flokk. Hann heldur, at slíkur vinstraflokkur hevði fingið seks ella sjey sessir í altinginum, skrivar íslendska kringvarpið.

Steingrímur J. Sigfússon vísir á, at flokkarnir á vinstraveingi, sum mistu øll síni tingfólk á valinum leygardagin, fingu 10 prosent av atkvøðunum tilsamans. Tinggáttin í Íslandi er fimm prosent.

Samfylkingin er einasti flokkur vinstrumegin miðjuna, sum nú situr í altinginum. Hann gjørdist størsti flokkur á altingsvalinum.