Fleiri fáa bókasavnsgjald

Øll í mentanarnevndini hjá løgtinginum taka undir við uppskotinum hjá Sirið Stenberg, landsstýriskvinnu í mentamálum, um at broyta bókasavnslógina, so fleiri fáa bókasavnsgjald.

Endamálið við uppskotinum er at geva heimild til, at øll, sum hava tilfar til taks á bókasavninum, prentað ella talgilt, fáa bókasavnsgjald.

Tað eru tónaskøld, fotografar og upplesarar.

Tónaskøld og fotografar fingu bókasavnsgjald til 31. desember 2023.

Av misgáum

Men av misgáum eru tey ikki við í nýggju lógini, sum var samtykt í fjør. 

Upplesarar hava ikki fingið fyrr og eru tí einasti nýggi bólkur, sum skal fáa bókasavnsgjald, tá ein ljóðbók verður útlænt á bókasavninum.

Rithøvundafelagið sigur, at skaldsøgur, stuttsøgur, yrkingar og barnabøkur eiga at raðfestast hægri enn aðrar bøkur í skipanini um bókasavnsgjald.

Hesar viðmerkingar eru um kunngerðina um býtið.

Tær hava tí onga ávirkan á lógaruppskotið og vera viðgjørdar fyri seg, sigur Almanna- og Mentamálaráðið. 

Rithøvundafelagið sigur, at ongar viðmerkingar hjá felagnum eru tiknar við, tá kunngerðin var gjørd.