Nú er undirskotið 120 milliónir

Hallið næsta ár verður harvið 37 milliónir krónur meira enn í fíggjarlógaruppskotinum, sum Ruth Vang, landsstýriskvinna legði fyri løgtingið 30.september.

Samgongumeirilutin í fíggjarnevndini hevur eina røð av broytingum, og harumframt eru broyttar inntøkumetingar tiknar við í álitið, sum varð lagt fram klokkan fimm seinnapartin.

Nýggjastu inntøkumetingarnar hjá Fíggjarmálaráðnum vísa at minni kemur inn í skatti, kapitalvinningsskatti og meirvirðisgjaldi næsta ár, enn roknað varð við í heyst.

Men afturfyri roknar Fíggjarmálaráðið við at meira kemur inn í vinningsbýti frá almennu partafeløgunum og grunnunum, sum landsstýrið varar av.

Millum broytingaruppskotini frá samgongumeirilutanum í fíggjarnevndini eru 1,1 millión krónur afturat til Hagstovuna, Málráðið fær 300.000 krónur afturat og nýggja sjósavnið á Argjum fær 2,5 milliónir krónur.

Andstøðu-minnilutin í fíggjarnevndini hevur eisini fleiri broytingar í sínum minnilutaáliti. Við teirra broytingum og raðfestingum verður undirskotið 112 milliónir krónur næsta ár.

Sum einasti fíggjarnevndarlimur mælir Magnus Rasmussen úr Sambandsflokkinum til, at ríkisveitingin úr Danmark ikki minkar við 25 milliónum krónum næsta ár, soleiðis sum landsstýrið ætlar. 

Uppskotið til fíggjarlóg fyri 2025 kemur til 2.viðgerð mánadagin.

Álitið til fíggjarlógaruppskotið fyri 2025 kann lesast HER.