Ferðavinnufelagið: Heimablídni verður misbrúkt

Heimablídni verður misbrúkt, og dømi eru um ólógligt virksemi. 

Tað hevur vundið upp á seg, at alt fleiri selja mat heimanífrá og fleiri eru farin at selja eitt nú køkur, vaflur, pitsur, matpakkar og gera matveiting til tiltøk og mangt annað, uttan at vera í heimablídni ella løggild.

Tað sigur Ferðavinnufelagið.

Felagið hevur havt broytingar í tveimum kunngerðum um matvørur til hoyringar, millum annað nýggja skipanina við brámyndum, sum felagið tekur undir við.

Mæla til at endurskoða heimablídni

Ferðavinnufelagið mælir til at endurskoða heimablídni fyri at verja góðkenda og løggilda virksemið.

Tey, sum fara undir matvøruvirksemi, skulu skrásetast og útvega sær loyvi. 

Hetta ger javnari og rættvísari kapping. 

Matstovuvinnan stríðist fyri at yvirliva.

Tí er tað umráðandi, at henda vinnan ikki eisini skal kappast við ólógligt heimablídni, sigur Ferðavinnufelagið.