Watson hevur ikki gloymt grindadrápini

Paul Watson nevnir Føroyar, tá hann í samrøðu við grønlendska miðilin Sermitsiaq sigur, at hann er longu farin at fyrireika sínu næstu átøk.

Serliga Japan er á skránni, men eisini Ísland og Føroyar, sigur hann.

Tey nógvu grindadrápini í Føroyum eru óforsvarlig, og tey eiga at vera steðgað.

Eingin skal ivast í, at vit halda fram at berjast fyri hvalinum, eisini í Føroyum, sigur Paul Watson við 
Sermitsiaq.

Paul Watson

Mynd: Ritzau / Scanpix

Ólóglig hvalaveiða

Watson sigur, at hann og hansara fólk fara at steðga tí, sum hann kallar ólógliga hvalaveiðu.

Paul Watson og verjar hansara halda fast uppá, at Hægstirættur eigur at taka støðu til, at Landsrætturin í Grønlandi ferð eftir ferð staðfesti avgerðina hjá rættinum í Grønlandi at varðhaldsfongsla Watson.

Teir sluppu ikki at koma við sínum prógvum í Landsrættinum.

Prógv, sum sambært teimum staðfesta, at Paul Watson er ósekur.

Hann var fimm mánaðir í varðhaldi í Nuuk.

Paul Watson hevur ikki enn gjørt av, um hann fer at krevja endurgjald fyri tíðina, hann var í varðhaldi.